نقد فيلم عسل أسود بأقلام القراء
أسعد دائما بمساحة الحرية التى نحصل إليها على النت وإن كانت إفتراضية ، الحرية التى أتحدث عنها لا تقف الحكومة أو الحزب الحاكم في طريقها لكن من يقف في طريقها هو فكرة الطغيان بالعامة التى أجاد المتأسلمون استغلالها لذلك أسعد بردود القراء وأري أن من حقهم أن تفرد لهم مساحة حقيقية لنشر أرائهم جنبا الى جنب مع مقالاتانا
هذا الرد وصلنى على مقال القراء يتفاعلون وأنشره دون تدخل فيه
عزيزي هشام اشكرك جدا لتقديرك لردي ونشره واهتمامك بالاراء وكمان بعتذرلك بشدة على التاخر في الرد لظروف الامتحانات. انا شفت فيلم عسل اسود وزي ما قلتلك وتوقعت كاد يختم الفيلم بقرآن فالبطل له اكثر من مشهد يصلي فيه في لقطات غير مبررة بالمرة.. تخيل يا هشام السينما واللي بقت فيها مكناش راضيين بسينما رابسو طلعلنا افلام هتعملنا ازاي نتوضى كمان سنتين طبعا فيه ناس سابت المشاهد غير المبررة دي واتجهت لمشهد تاني كان في وجهة نظرهم وهى مشهد دينا وهي بتوزع لحمة على الفقرا وكان اعتراضهم على استخدامهم لشخصية "زي دي" هي اللي تطلع بتعمل خير مع انها بتعمل كده في الحقيقة وفيه اللي كان شايف ان سبب استخدامها في الفيلم عشان يبينوا ان "حتى الرقاصات" المصريين جدعان
جزء دينا دة يا هشام قصة لوحدها.. الناس دلوقتي بالنسبالها الاخلاق هي اللبس والجنس وبس. مع ان الاخلاق عمرها ما كانت كده وطول عمرها بتشمل حاجات اعظم واهم بكتير من هدوم ورقص زي ان الواحد ميئذيش غيره لا بلفظ ولا بتهكم او انه يكون امين او محترم او انه يشيل صاحبه ويبقى جدع معاه هما سابوا كل ده ومسكوا في انها رقاصة وطلعوا كل ده من مصطلحاتهم يمكن لانهم بيفتقروا للحاجات دي؟ مش عارف
مع ان اللي عرف دينا شخصيا حكالي عنها انها انسانة في منتهى الروعة و100 راجل
المهم الفيلم نفسه مستواه الفني مش قوي يمكن اللي شال الفيلم افيهات احمد حلمي وطلة احمد حلمي نفسها انما الفيلم كله بيمشي على خط واحد وهو اصطدام المصري اللي جي من برا بسلبيات الشارع والناس ودي حاجة اتقتلت نقاش وتريقة في الفيس بوك والستاند اب كوميدي والتوك شو. اتمنى يا هشام بجد ان الوضع يتغير وميحصلش اللي انا متوقعه، نفسي يسيبوا مساحة لليبراليين في السينما زي ما ليهم مساحة في المسرح (شفت بالمناسبة مسرحية الجراد زن زن زن؟) زي ما جيل المتدينيين اتفتحله الباب على اخره.
انا عارف اني طولت عليك بس عايز اوريك صورة للجيل المتدين بالتحديد عمرو سلامة ومحمد دياب مع الطفل المعجزة البرادعي
يا ترى ايه الموضوع؟ :)
ليست هناك تعليقات:
إرسال تعليق